ՀՀ կառավարության 2025 թվականի օգոստոսի 7-ի նիստում հավանության է արժանացել ՀՀ տարածքային կառավարման և ենթակառուցվածքների նախարարության կողմից ներկայացված «Անշարժ գույք ամրացնելու և անհատույց օգտագործման իրավունքով ամրացնելու մասին» որոշման նախագիծը։
Հակակոռուպցիոն դատարանը բավարարել է գլխավոր դատախազության ներկայացրած հայցերը և վերականգնել է Հայաստանի Հանրապետության իրավունքը Երևան քաղաքի Նորք-Մարաշ վարչական շրջանի Գ. Հովսեփյան փողոցում գտնվող, հեռուստաաշտարակին հարող տարածքում 5 հողամասի նկատմամբ։
Նախագծով Հայաստանի Հանրապետության սեփականությունը հանդիսացող՝ Երևան քաղաքում, Նորք-Մարաշ վարչական շրջանում, Գ. Հովսեփյան փողոցին հարող տարածքում գտնվող, շուրջ 1.773 հա մակերեսով հողամասը, որի կադաստրային արժեքը կազմում է 1,044,444,159 դրամ, անհատույց օգտագործման իրավունքով ամրացվում է ՀՀ շրջակա միջավայրի նախարարությանը։
Հիշյալ հողատարածքը նախատեսվում է ամրացնել նախարարության «Հայանտառ» պետական ոչ առևտրային կազմակերպությանը՝ այն անտառային հողի նպատակային նշանակությամբ փոխելու և Հայաստանի անտառային օրենսդրությամբ սահմանված կարգով կայուն կառավարման ապահովման նպատակով։
Շրջակա միջավայրի նախարարությունը քննարկում է վերոնշյալ տարածքներում Երևանի բնակիչների կյանքի որակի բարձրացմանն ուղղված ծրագրերի իրականացում, այդ թվում՝ միջազգային գործընկերների ներգրավմամբ։
Ծրագրի շրջանակներում նախատեսվում է իրականացնել անտառապատման, անտառվերականգնման և հետագա խնամքի աշխատանքներ, ինչի արդյունքում Երևան քաղաքում կստեղծվի մոտ 7 հեկտար մակերեսով նոր անտառպուրակ։
Ծրագրի իրականացումը կնպաստի՝
- մայրաքաղաքում անտառածածկ մակերեսի ընդլայնմանը,
- հողի դեգրադացիայի կանխմանը,
- ածխաթթու գազի կլանմանը և թթվածնի արտանետմանը,
- փոշու տարածման նվազեցմանը
- և ընդհանուր առմամբ՝ մարդկանց առողջ կենսամիջավայրի ձևավորմանը։