Հայաստանի ամերիկյան համալսարանում կայացավ Հայաստանում քիմիական նյութերի կառավարման օրենսդրական շրջանակի ձևավորմանը նվիրված տեխնիկական քննարկում, որը կազմակերպվել էր Հայաստանի ամերիկյան համալսարանի Յակոբեան բնապահպանական կենտրոնի և Ստոկհոլմի շրջակա միջավայրի ինստիտուտի կողմից՝ Կանաչ օրակարգ ծրագրի շրջանակում։
Քննարկմանը մասնակցում էր շրջակա միջավայրի նախարարի տեղակալ Արա Մկրտչյանը, որն իր ողջույնի խոսքում շեշտեց ոլորտում միասնական և համակարգային մոտեցումների անհրաժեշտությունը՝ ընդգծելով նոր օրենսդրության մշակման կարևորության մասին։
Ներկա էին նաև շահագրգիռ պետական գերատեսչությունների, տեսչական մարմինների, փորձաքննող և հետազոտական կառույցների ներկայացուցիչներ։
Քննարկման նպատակը Հայաստանի քիմիական նյութերի կառավարման համակարգի ձևավորման ուղղությամբ անհրաժեշտ գնահատման շրջանակի ճշգրտումն էր, ինչպես նաև ԵՄ, ԵԱՏՄ օրենսդրությունների, ՀՀ ստանձնած պարտավորությունների հնարավոր համադրման ուղղությունները։
Մասնակիցները ներկայացրեցին իրենց դիտարկումները՝ անդրադառնալով մի շարք առանցքային ուղղությունների.
- Քիմիական նյութերի կառավարման ոլորտի միջազգային լավագույն փորձի ուսումնասիրություն
- Գոյություն ունեցող օրենսդրական բացերի և ինստիտուցիոնալ դերերի գնահատում
- Հայաստանի համար իրատեսական և կիրառելի օրենսդրական մոդելների քննարկում
- Քիմիական նյութերի մասին օրենքի նախագծի շրջանակի և կառուցվածքի սահմանում
- Նոր կարգավորող համակարգի մշակման համար հաջորդ քայլերի հստակեցում:
Գործընկերների ելույթներում անդրադարձ կատարվեց նաև շվեդական փորձի ներգրավման կարևորությանը։
Աշխատաժողովի քննարկման արդյունքներն ամփոփվեցին Շրջակա միջավայրի նախարարությունում։ Նախանշվեցին առկա հարցերն ու խնդիրները, հետագա անելիքներն ու դրանց լուծման ուղիները։