Ս.թ. նոյեմբերի 26-27-ը ՄԱԿ-ի Զարգացման ծրագիրը (ՄԱԶԾ)  ներքին գործերի նախարարության և  շրջակա միջավայրի նախարարության հետ համատեղ կազմակերպել է ազգային ինքնագնահատման աշխատաժողով՝ գնահատելու Հայաստանի ՎՆՀ վիճակը՝ «Վաղ նախազգուշացումներ բոլորի համար» (EW4All) գլոբալ նախաձեռնության շրջանակում։
Երկօրյա աշխատաժողովին մասնակցել են մեկ տասնյակից ավել գերատեսչությունների, տեղական ինքնակառավարման մարմինների, գիտահետազոտական կազմակերպությունների, ՄԱԿ-ի գործակալությունների, EW4All նախաձեռնության 4 հենասյուները ներկայացնող կազմակերպությունների (UNDRR, WMO, ITU, IFRC) տեխնիկական մասնագետների, քաղաքացիական հասարակության շուրջ 50 ներկայացուցիչ։ 
Ներքին գործերի փոխնախարար Արմեն Ղազարյանն իր խոսքում նշել է, որ վաղ նախազգուշացման համակարգերի արդիականացումը բխում է 2025թ. ընդունված «Աղետների ռիսկի կառավարման և բնակչության պաշտպանության մասին» ՀՀ օրենքի դրույթներից։
ՄԱԶԾ մշտական ներկայացուցչի տեղակալ Կոնստանտին Սոկուլսկին իր ելույթում կարևորելով  Հայաստանում բազմավտանգ ՎՆՀ զարգացման ազգային հանձնառությունները, դրանք որակել է  որպես երկարաժամկետ դիմակայունության հիմնական նախապայմաններ։
Շրջակա միջավայրի նախարարության «Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը ներկայացրել է կլիմայական և հիդրոօդերևութաբանական վտանգների կանխատեսման և վաղ նախազգուշացման ուղղությամբ իրականացվող աշխատանքները՝ ընդգծելով նախարարության առանցքային դերը այդ ռիսկերի կանխատեսման և նախազգուշացման ազգային համակարգերի զարգացման մեջ։
Աշխատաժողովը հետևելով միջազգայնորեն հաստատված EW4All կառուցվածքին՝ կենտրոնացել է ՎՆՀ չորս հիմնական բաղադրիչների վրա.

• Ռիսկերի վերաբերյալ գիտելիքներ
• Մոնիթորինգ, կանխատեսում և վերլուծություն
• Նախազգուշացումների տարածում և հաղորդակցություն
• Նախազգուշացումներին պատրաստվածություն և արձագանքում։

Հայաստանը կշարունակի արդիականացնել ռիսկերի մշտադիտարկման և հանրային նախազգուշացման իր համակարգերը։ Ծրագրվում է ՎՆՀ վերջնական ճանապարհային քարտեզը ներկայացնել վավերացման՝ հաջորդ տարվա սկզբին նախատեսված համապատասխան միջոցառման ժամանակ։
Աշխատաժողովը կազմակերպվել էր ՄԱԶԾ «Ջրամբարների կառավարման կարողությունների կատարելագործում կլիմայական ռիսկերին դիմակայունության համար» ծրագրի շրջանակներում, որը ֆինանսավորվում է Ճապոնիայի կառավարության կողմից։  Հիդրոօդերևութաբանության համաշխարհային կազմակերպությունը ֆինանսավորում է EW4ALL նախաձեռնության շրջանակներում իրականացվող կարիքների գնահատումը և Հայաստանի ՎՀՆ ճանապարհային քարտեզի մշակումը։